Milli birliyin möhkəmləndirilməsi informasiya mühitində sağlam düşüncədən başlayır

Müasir dövrdə qlobal informasiya məkanının sürətli inkişafı, rəqəmsal platformaların gündəlik həyatımızın ayrılmaz hissəsinə çevrilməsi cəmiyyət qarşısında yeni çağırışlar və vəzifələr qoyur. Xüsusilə informasiya təhlükəsizliyinin qorunması, dezinformasiya və manipulyasiyalara qarşı dayanıqlığın artırılması hər bir dövlət və cəmiyyət üçün strateji əhəmiyyət daşıyır. İnformasiya mühitində sağlam düşüncənin formalaşması milli birliyin və ictimai həmrəyliyin əsas təməlidir. Cəmiyyətin hər bir üzvü – xüsusilə gənc nəsil və media nümayəndələri yayılan xəbərlərə tənqidi yanaşmaq, məlumatları dəqiqləşdirmək və dövlətçilik maraqlarını hər şeydən üstdə tutmaq bacarığı nümayiş etdirməlidirlər. Azərbaycanın informasiya məkanında milli maraqların qorunması, cəmiyyətdə sağlam ictimai rəyin formalaşdırılması və dezinformasiyalara qarşı operativ reaksiya verilməsi istiqamətində ardıcıl tədbirlər həyata keçirilir. İnformasiya mədəniyyətinin yüksəldilməsi və mediada peşəkar prinsiplərə sadiqlik milli birliyimizi daha da gücləndirən mühüm amillərdəndir.