YAP Nərimanov Rayon Təşkilatının XII Konfransı Keçirilib

Sentyabrın 8-də Yeni Azərbaycan Partiyası (YAP) Nərimanov rayon təşkilatının XII konfransı keçirilib. Məlumata görə, tədbirdən öncə Ümummilli Lider Heydər Əliyevin büstü önünə gül dəstələri düzülüb. Daha sonra Ulu Öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərin xatirəsi birdəqiqəlik sükutla yad olunub, Dövlət Himni səsləndirilib. Konfransı giriş sözü ilə açan YAP Nərimanov rayon təşkilatının sədri Elçin Quliyev hesabat məruzəsi ilə çıxış edərək təşkilatın fəaliyyəti və qarşıda duran vəzifələr barədə məlumat verib. O, 2021-ci ildə keçirilən VII qurultayın partiyanın fəaliyyətinin gücləndirilməsi baxımından mühüm mərhələ olduğunu vurğulayıb. Tədbirdə çıxış edən Nərimanov Rayon İcra Hakimiyyətinin başçısı Elgin Həbibullayev, YAP İdarə Heyətinin üzvü, Milli Məclisin deputatı Hikmət Babaoğlu, YAP İdarə Heyətinin üzvü Tofiq Cahangirov və Milli Məclisin deputatı Samir Vəliyev YAP-ın ölkənin siyasi, sosial və iqtisadi inkişafındakı rolundan söz açıblar. Çıxışlarda Prezident İlham Əliyevin rəhbərliyi ilə kazanılan 44 günlük Vətən müharibəsi Zəfəri və 2023-cü il antiterror tədbirləri nəticəsində ərazi bütövlüyünün tam bərpa olunması xüsusi vurğulanıb. Həmçinin Şəhər Bələdiyyələri Milli Assosiasiyasının və Nərimanov Bələdiyyəsinin sədri Təmraz Tağıyev, SOCAR-ın Aparat rəhbəri Hafiz Zeynalov, YAP Gənclər Birliyinin üzvü Ülviyyə Axundova, Vətən Müharibəsi Qəhrəmanı, şəhid Azad Hümbətovun atası Arif Hümbətov və YAP Mərkəzi Aparatının Təşkilat şöbəsi müdirinin müavini Rəfael Gülməmmədov çıxış edərək rayon təşkilatının işini yüksək qiymətləndiriblər. Sonda YAP Nərimanov rayon təşkilatının hesabat dövründəki fəaliyyəti qənaətbəxş hesab edilib və YAP-ın VIII Qurultayına nümayəndələr seçilib. Tədbir Yeni Azərbaycan Partiyasının himninin səsləndirilməsi ilə yekunlaşıb.