Makron: "Fransa Ukraynaya raket-interseptorlar göndərəcək"

Fransa Respublikasının Prezidenti Emmanuel Makron Rusiyanın Ukraynanın Krivoy Roq şəhərində yerləşən ticarət mərkəzinə endirdiyi raket zərbəsindən sonra rəsmi Kiyevə göstərilən hərbi köməyin gücləndiriləcəyini bəyan edib. Bu barədə Fransa dövlət başçısı Ukrayna Prezidenti Volodimir Zelenski ilə keçirdiyi telefon danışığından sonra "X" sosial şəbəkəsindəki rəsmi hesabında bildirib. Makron mülki infrastruktura təşkil olunan hücumu kəskin pisləyib və Ukrayna xalqı ilə həmrəy olduğunu vurğulayıb. Fransa lideri qeyd edib ki, Paris Ukraynanın hava hücumundan müdafiə imkanlarını artırmaq məqsədilə ölkəyə raket-interseptorlar göndərəcək. Həmçinin, ballistik raketlərə qarşı beynəlxalq koalisiya çərçivəsində tərəfdaşlığın davam etdiriləcəyi diqqətə çatdırılıb.