Hikmət Hacıyev: Ermənistan hökuməti cəmiyyətini sülhə hazırlamalıdır

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Ermənistan hökumətini öz cəmiyyətinin sülhə hazırlanması istiqamətində fəal işləməyə çağırıb. Hikmət Hacıyev bu fikirləri Bakıda keçirilən CAMCA 2026 Regional Forumunun ikinci günündə çıxışı zamanı səsləndirib. O bildirib ki, Azərbaycanla Ermənistan arasında sülhün yalnız sənəd üzərində təsbit edilməsi kifayət deyil, onun praktikada reallaşdırılması və dayanıqlı hala gətirilməsi vacibdir. Prezidentin köməkçisi qeyd edib ki, Azərbaycan regionda uzunmüddətli sülh və sabitliyə əsaslanan yeni əməkdaşlıq mühitinin formalaşmasında maraqlıdır. Onun sözlərinə görə, münaqişədən sonrakı mərhələdə qarşılıqlı etimadın yaradılması və xalqların sülhə hazırlanması xüsusi əhəmiyyət daşıyır. Hikmət Hacıyev vurğulayıb ki, Azərbaycan yekun sülh sazişinin imzalanması üçün Ermənistan Konstitusiyasında Azərbaycana qarşı ərazi iddiaları kimi qiymətləndirilən müddəaların dəyişdirilməsini gözləyir. O hesab edir ki, bu addımdan sonra yekun sülh sazişinin imzalanması reallığa çevrilə bilər. Forumdakı çıxışında Hacıyev Azərbaycanın xarici siyasətində iqtisadi diplomatiyaya, enerji əməkdaşlığına və regional əlaqəliliyə xüsusi diqqət yetirdiyini də bildirib. O, Azərbaycan və Mərkəzi Asiya ölkələrinin Avrasiyanın nəqliyyat-kommunikasiya xəritəsinin dəyişdirilməsi istiqamətində birgə çalışdığını qeyd edib.