Daşkənddə Azərbaycan Prezidentinin rəsmi qarşılanma mərasimi keçirilib, Şavkat Mirziyoyev səfərlə bağlı paylaşım edib

Avqustun 23-də Özbəkistana dövlət səfərinə gələn Azərbaycan Respublikasının Prezidenti İlham Əliyevin Daşkənddəki “Kuksaroy” Dövlət İqamətgahında rəsmi qarşılanma mərasimi olub. Qarşılanma mərasimində Özbəkistan Prezidenti Şavkat Mirziyoyev dövlətimizin başçısını samimiyyətlə salamlayıb. Hər iki ölkənin dövlət bayraqlarının dalğalandığı meydanda fəxri qarovul dəstəsi düzülüb, Azərbaycanın və Özbəkistanın dövlət himnləri səsləndirilib. Liderlər fəxri qarovul dəstəsinin önündən keçərək rəsmi nümayəndə heyətlərini bir-birinə təqdim ediblər. Paralel olaraq, Özbəkistan Prezidenti Şavkat Mirziyoyev Prezident İlham Əliyevin dövlət səfəri ilə bağlı rəsmi sosial media hesablarında xüsusi paylaşım edib. Özbəkistan lideri paylaşımında iki qardaş ölkə arasındakı strateji tərəfdaşlıq və müttəfiqlik münasibətlərinin yüksək səviyyəsini vurğulayaraq, bu səfərin ikitərəfli əlaqələrin inkişafında yeni mərhələ olacağını bildirib. Mərasimdən sonra dövlət başçılarının təkbətək və heyətlərarası geniş tərkibdə görüşlərinə başlanılıb.