Bakıda Yeni Azərbaycan Partiyasının VIII Qurultayı keçirilir

Qurultayda Azərbaycan Respublikasının Prezidenti, Yeni Azərbaycan Partiyasının Sədri İlham Əliyev çıxış edib. Dövlət başçısı YAP-ı Cənubi Qafqazın ən böyük siyasi qüvvəsi adlandırıb və bildirib ki, bu qurultay Azərbaycanın ərazi bütövlüyünü və suverenliyini tam bərpa etməsindən sonra keçirilən ilk partiya qurultayıdır. Prezident çıxışında ölkənin xarici siyasət xəttinə, milli ideoloji məsələlərə və dövlət müstəqilliyinin qorunmasına da toxunub. O, Azərbaycanın xarici siyasətini elə qurmasının vacibliyini vurğulayıb ki, heç bir qüvvə ölkənin daxili işlərinə müdaxilə edə bilməsin. İlham Əliyev həmçinin müasir çağırışlara uyğun ideoloji fəaliyyətin gücləndirilməsinin əhəmiyyətini qeyd edib. Qurultaya YAP-ın rayon və şəhər təşkilatlarından 960 nümayəndə seçilib. Tədbirə hazırlıq çərçivəsində sentyabrın 7-dən 19-dək partiyanın 84 yerli təşkilatında hesabat konfransları keçirilib. Konfranslarda VII Qurultaydan sonra qarşıya qoyulmuş vəzifələrin icrası, görülən işlər və əldə olunan nəticələr müzakirə olunub. Qurultayın gedişi, müzakirə edilən məsələlər və qəbul olunacaq qərarlarla bağlı əlavə məlumatların açıqlanması gözlənilir.