Bakıda dini liderlərin görüşü: mənəvi həmrəyliyin mühüm ünvanı

Şəfiqə Qədirova YAP Nərimanov rayon təşkilatının fəal gənci Azərbaycanın paytaxtı Bakı müxtəlif beynəlxalq tədbirlərə və mühüm görüşlərə ev sahibliyi etməklə ölkəmizin dini və mədəni əməkdaşlıq sahəsində də fəal rolunu nümayiş etdirir. Türk Dövlətləri Təşkilatının Müsəlman Dini Rəhbərləri Şurasının 7-ci toplantısının və böyük Azərbaycan şairi və mütəfəkkiri Seyid Yəhya Bakuvi yaradıcılığına həsr olunmuş beynəlxalq konfransın Bakıda keçirilməsi bunun növbəti göstəricisidir. Prezident İlham Əliyevin Türk Dövlətləri Təşkilatının Müsəlman Dini Rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul etməsi mühüm hadisədir. Görüş zamanı dini liderlərin bir araya gəlməsinin, qarşılıqlı fikir mübadiləsinin və ortaq dəyərlər ətrafında əməkdaşlığın əhəmiyyəti ön plana çıxıb. Seyid Yəhya Bakuvi kimi böyük mütəfəkkirin irsinin beynəlxalq səviyyədə müzakirə olunması Azərbaycan tarixinin və zəngin mənəvi irsinin təbliği baxımından da xüsusi əhəmiyyət daşıyır. Bu cür tədbirlər müxtəlif ölkələrin dini və ictimai xadimləri arasında əlaqələrin inkişafına, qarşılıqlı anlaşma və həmrəyliyin möhkəmlənməsinə imkan yaradır. Prezident İlham Əliyev çıxışında Azərbaycanın keçdiyi tarixi yola da toxunaraq bildirib ki, Azərbaycan xalqı bir yumruq kimi birləşərək öz ərazi bütövlüyünü, suverenliyini, beynəlxalq hüququ və ədaləti bərpa edib. Bu fikir xalqımızın birlik və həmrəylik ruhunun ölkəmizin əldə etdiyi tarixi nəticələrdəki əhəmiyyətini ifadə edir. Azərbaycanın multikultural və tolerant dəyərlərə əsaslanan təcrübəsi də görüşün mühüm mövzularından biri kimi diqqət çəkir. Dini liderlərin Bakıda bir araya gəlməsi müxtəlif dini və mədəni ənənələr arasında dialoqun inkişafı baxımından əhəmiyyətlidir. Prezident İlham Əliyevin dini idarə rəhbərləri və beynəlxalq tədbirlərin iştirakçıları ilə görüşü Azərbaycanın dini-mənəvi əməkdaşlığa verdiyi önəmi nümayiş etdirir. Bakıda keçirilən bu tədbirlər həm Seyid Yəhya Bakuvi irsinin təbliğinə, həm də ortaq dəyərlər əsasında qarşılıqlı əlaqələrin gücləndirilməsinə xidmət edir. Bu görüşlər mənəvi həmrəyliyin, qarşılıqlı hörmətin və əməkdaşlığın təşviqi baxımından əhəmiyyətli platforma olaraq diqqəti cəlb edir.