Azərbaycanla Özbəkistan arasında bir sıra əməkdaşlıq sənədləri imzalanıb

Azərbaycan və Özbəkistan arasında iqtisadi əməkdaşlığın genişləndirilməsi istiqamətində mühüm addımlar atılıb. Ölkələr arasında keçirilən 4-cü Regionlararası Forum çərçivəsində müxtəlif sahələri əhatə edən bir sıra sənədlər imzalanıb. İqtisadiyyat naziri Mikayıl Cabbarov bildirib ki, Azərbaycan–Özbəkistan münasibətlərinin dövlət başçılarının siyasi iradəsi əsasında sürətli inkişafı iqtisadi əlaqələrin şaxələndirilməsinə və iki ölkənin biznes dairələri arasında tərəfdaşlığın gücləndirilməsinə mühüm imkanlar yaradır. Forum çərçivəsində imzalanan sənədlər enerji, maliyyə, infrastruktur, tikinti və istehsal kimi prioritet istiqamətlərdə əməkdaşlığın inkişafını nəzərdə tutur. Yeni razılaşmaların Azərbaycan və Özbəkistanın biznes assosiasiyaları arasında əlaqələrin möhkəmləndirilməsinə, özəl sektorun potensialından daha səmərəli istifadə olunmasına və birgə layihələrin həyata keçirilməsinə töhfə verəcəyi gözlənilir. Mikayıl Cabbarovun sözlərinə görə, bu cür təşəbbüslər iki ölkə arasında iqtisadi və biznes əlaqələrinin daha da dərinləşdirilməsinə xidmət edir.