Azərbaycan Prezidenti və Birinci Xanım Hərbi Dəniz Qüvvələrində Olublar: Müasir İnsansız Dəniz Vasitələri Sınaqdan Keçirilib

Azərbaycan Respublikasının Prezidenti İlham Əliyev və birinci xanım Mehriban Əliyeva Hərbi Dəniz Qüvvələrinin bazasına baş çəkiblər. Ziyarət çərçivəsində dövlət başçısına yeni texnoloji imkanlara malik SALVO və KAYRA insansız dəniz vasitələri (İDV) təqdim olunub. Qabaqcıl imkanları ilə seçilən bu müasir hərbi vasitələrin yerində praktiki sınaqları keçirilib. Sınaqlar zamanı insansız dəniz vasitələrinin idarəolunma xüsusiyyətləri, manuver qabiliyyəti və döyüş tapşırıqlarını icraetmə imkanları əyani nümayiş etdirilib. Səfərin sonunda Silahlı Qüvvələrin Ali Baş Komandanı İlham Əliyevin sədrliyi ilə hərbi quruculuq məsələlərinə dair operativ müşavirə keçirilib. Müşavirədə Hərbi Dəniz Qüvvələrinin maddi-texniki bazasının daha da möhkəmləndirilməsi, Xəzər dənizində təhlükəsizlik tədbirlərinin gücləndirilməsi və qarşıda duran strateji tapşırıqlar geniş müzakirə olunub.